#நாவல் அறிமுகம் #,தேரிப்பிச்சி

நாவல். : தேரிப் பிச்சி. ஆசிரியர் : கண்ணகுமார விஸ்வரூபன். (தேரிக்காட்டு இலக்கியவாதி ) தமிழ் வெளி பதிப்பகம் ( எண் 90 940 05 000) விலை : ரூபாய் 240. முதல் பதிப்பு : மே 2026 நூலின் ஆசிரியருக்கு தோழர் நல்லகண்ணு தேரிக்காட்டு இலக்கியவாதி எனப் பெயர் வழங்கி இருக்கிறார். நெல்லை மாவட்டத்தின் பாலைவனப் பகுதி தான் தேரிக்காடு. தேரி மக்களின் வாழ்வியலைப் புரிந்து கொள்ள இவர் எழுதிய தேரியாயணம் என்ற நூலையும் வாசியுங்கள் . ஒரு நிகழ்வில் பேசும்போது சொன்னார் . நான் கறிக்கடை வைத்து நடத்துகிறேன். அங்கே இருக்கும் போது ஒரு லுங்கியும் மேலே ஒரு துண்டும் தான் அணிந்திருப்பேன் . அப்படி என்னைப் பார்ப்பவர்கள் என்னை ஒரு இலக்கியவாதி என்றே ஏற்றுக் கொள்ள மாட்டார்கள் என்றார் . தேரிப் பிச்சி என்ற ஒரு அன்பு நிறைப் பெண்ணின் வாழ்க்கையுள் மண் துகளுக்கு ஒரு மானிடக்கதை என மறைந்து கிடக்கிறது. . " என்னை ஆக்கிரமிப்பாய் ஆட் கொண்ட பிச்சி என்னை எழுது எழுது என்றாள் " என்கிறார் ஆசிரியர். நாவலில் வரும் ஒரு கதையைச் சொன்னால் தேரி என்றால் என்ன என்று புரிந்துவிடும். நாசரேத்தில் வாரம் ஒரு முறை சந்தை நடக்கும். அதற்கு பக்கத்து ஊர்களில் இருந்து எல்லாம் சாமான் செட்டு வாங்க வருவார்கள். அப்படி பக்கத்து ஊரிலிருந்து கைப்புள்ளைக்காரி ஒருத்தி தன் பிள்ளைக்கு பசி அமர்த்தி தொட்டிலில் போட்டு ஓட்டமா ஓடிப்போயிட்டு வந்துரலாம்னு சந்தைக்கு வந்தாளாம். தாயும் பிள்ளையும் மட்டும் தான் வீட்டில் . சாமான் வாங்கித் தேரிக் குள்ள பாதி தூரம் திரும்பி வந்தப்போ இவளோட கெட்ட நேரம் போல காத்து கிளம்பி இருக்குது. ஆடி மாசம் அண்டத்தைப் புரட்டின அந்த அகோர காத்தால இவளுக்கு வீட்டுக்கு வர்ற தடம் மாறி போச்சு . வாயைத் திறந்தால் வாய்க்குள்ள மண்ணு . கண்ணைத் திறந்தால் கண்ணுக்குள்ள மண்ணு . ஒரு வழியா காத்து அமர்ந்து இருக்கு. . புழுதி எல்லாம் அடங்கின பிறகு வழித்தடம் எல்லாம் மாறிப் போச்சு . வீட்டுக்கு வழி தெரியல. பிள்ளையை நெனச்சு கலங்கி அழுதப்போ தார்பாச்சு கட்டின வேட்டியும் தலையில பெரிய தலப்பாக்கட்டும் மேல் சட்டை போடாத மேனியும் கையில் ஆளொசர கம்புமா ஒரு பையன் பாதை காட்டுறான் . அவனுக்கு மட்டும் எப்படி பாதை தெரியுது . வீடு கொண்டு சேர்த்தவன் மாயமா மறைஞ்சு போனான். அவன் தான் கற்குவேல் அய்யனார். என்று கதை முடிகிறது. வில்லிசை பாடகி உடன்குடி தங்கே ஸ்வரியின் ஆலோலம் பாடல் ஒன்றைச் சொல்கிறார் . அவ்வளவு அழகது. " தேரி ஒசந்த கரை அழகாம் நல்ல செம்மணல் நிறைஞ்ச காடழகாம். காடு முழுக்க தெரடழகாம் நல்ல தெரட்டு மேல பனை அழகாம் " ஒரு அழகான இயற்கைக் காட்சி கண் முன்னால் வருதுல்ல. நாவலினூடே நம்மை திடுக்கிட செய்யும் வரிகள் வரும் . அதில் ஒன்று "சாவக்கிடந்தவன் சட்டென எழுந்து சண்டமாருதம் ஆடிவிட்டு சடார் என மீண்டும் சவக்கெடையாய் விழுந்துவிட்டது போல் இருந்தது. "ஓராண்டு மழை ஒரே நாளில் கொட்டினா போல ஒரு பெரும் மோசநாசம் (வாழ்க்கையில்) வந்து தாக்கினால் எப்பேர்ப்பட்ட மானிடனும் சீரழிந்து சின்னாபின்னமாகிப் போவான். " இவை எல்லாம் என்னை ரசிக்க வைத்ததில் ஒரு சில வரிகள் . துணிச்சலும் உறுதியும் வாழும் திறனும் படித்த பட்டணத்தில் வாழும் பெண்ணிடம் மட்டுமா இருக்கும் . தேரிக் காட்டில் வாழும் பிச்சி அதுவல்ல எங்களிடமும் இருக்கும் என்று சொல்லும் ஒரு வீரப் பெண்மணி. ஒரு சகாப்தத்தை நாவலாக்கி இருக்கிறார் ஆசிரியர். கொஞ்சம் கூட எதிர்பார்க்காத திருப்பம் வரும் போது மனம் ஒரு கணம் திடுக் என்கிறது. வாசிக்க தவறவிடாதீர்கள்.

#சினிமா விமர்சனம். டோரதி

மிக அதிகமாக பேசப்பட்ட படம் டோரதி. நெட்ஃப்ளிக்ஸ்சில் வந்து விட்டது. படத்தில் ஆர்வத்தை தூண்டுவதற்காக ஆரம்பமே கார்த்தி (ரிஷிகாந்த்) போனில் சுப்புவைக் (சனந்த்) கொன்று விட்டேன் என்கிறான். பள்ளி நட்பில் கதை தொடங்குகிறது , புது மாணவனாக வந்து சேரும் கார்த்தியை சுப்பு தைரியமாக பழைய மாணவர்களிடமிருந்து பாதுகாப்புக் கொடுக்கிறான். ஆனால் வளர்ந்த பின் கேங்ஸ்டர் ஆன சுப்புவின் குடும்ப உறவினர் ஒருவர் சுப்பு ரத்தத்தை கண்டு அஞ்சுபவனாகவும் கார்த்தி துணிச்சலாய் இருப்பதாகவும் சொல்கிறார் . இது படத்தின் கருவை மெல்லிய கோடிட்டு காட்டல் . ரிஷிகாந்த்தை ஏன் திடீரென்று ரஜினிகாந்த்தோடு ஒப்பிடுகிறார்கள் என நினைத்தேன். ராமன் ஆண்டாலும் ராவணன் ஆண்டாலும் எனக்கொரு கவலை யில்ல என்ற பாடலை "கல்யாண விருந்து" பாடல் நினைவுபடுத்துகிறது . ஆனால் ரஜினி முகத்தில் இருந்த அந்த ஒளி இங்கே கொஞ்சம் மிஸ்ஸிங் . பல வருடங்களுக்ககு முந்திய காலகட்டத்தில் நடந்த நிகழ்ச்சியாகத் தான் காட்டுகிறார்கள் . இன்னும் பத்து வருஷத்துல எங்களை எல்லோரும் ஏற்றுக் கொள்வாங்கன்னு ஜீவா சொல்றாங்க . அதனால அது நிகழ்காலக் கதை அல்ல. படத்தை எதிர்மறையாக விமர்சனம் செய்பவர்கள் , அநேகமாக படத்தை பார்க்காதவர்களாகத் தான் இருப்பார்கள். படிப்படியாக சுப்பு கதாபாத்திரத்தின் மேல் நம் அனுதாபத்தை கூட்டுகிறார்கள் அன்றைய பொது ஜனத்திற்கு அவர்கள் மேல் இருந்த அருவருப்பை காட்டுவதற்காக ஒம்போது அஜக் என்ற வார்த்தைகளைப் பயன்படுத்துவதன் மூலம் பிறழ் பிறப்பு கொண்டவர்கள் மேல் அனுதாபம் இல்லாத அந்த காலத்தை உணர்த்துகிறார்கள். பத்து வரிகளில் சொல்லக் கூடிய வசனத்தை ஒற்றை வார்த்தையில் "வரேன்டி" என்பதன் மூலம் கார்த்தி சுப்புவின் பால் மாற்றத்தை ஏற்றுக் கொண்டதை புரிய வைத்தது இயக்குனரின் திறமை. #ஸ்பாய்லர் இனி தான் படம் பார்க்கணும். படத்தைப் பற்றித் தெரிந்து கொள்ள வேண்டாம் என நினைப்பவர்கள் இங்கேயே பை பை சொல்லி நகர்ந்து கொள்ளுங்கள். கொலையைத் தவிர்த்து தமிழ்ப் படமே எடுக்க முடியாது போல . இதிலும் அடியாளாக பணிபுரியும் கார்த்தியிடமே அவன் நண்பன் சுப்புவை கொல்லும் பணி ஒப்படைக்கப்படுகிறது. ஏன்? அதுதான் அனைவரும் அறிந்த ரகசியமாச்சே . 16 வயதினிலேயே பெண்ணாக உணர்ந்த சுப்பு அதை மறைத்து ஆணாக நடமாடிக் கொண்டிருந்தவன் தன் தந்தை, அண்ணன்கள் செய்யும் அடாவடியில் வெறுத்து பெண் உடை தரித்ததால் குடும்ப கௌரவம் போய்விடும் என்று தான் கொல்லும் பணி. பின்னாளில் சுப்பு வும் கார்த்தியை விட்டு பிரிந்து விடக்கூடாது என்பதற்காகவே ஆணுடை தரித்து ஆணைப் போலவே அடாவடிகள் செய்ததாகச் சொல்கிறான். டோரதி (கீர்த்தி சுரேஷ் ) சுப்புவின் அண்ணனைத் திருமணம் செய்து வந்த சில நாட்களிலேயே தூக்கில் தொங்குகிறாள். அவளைத் தன் குடும்பத்தார் தான் கொன்று விட்டார்கள் என்று நம்பும் சுப்பு அந்த துயரத்தில் அவன் தோழி தனலட்சுமியைத் தாயாய் நினைத்து துயரத்தை கொட்டுகிறான். அதை கார்த்தி விசாரிக்கும் போது இப்போதைக்கு என் அழுகையை சகிக்கிறதுக்கு அவ ஒருத்தி தானே இருக்கிறாள் என்பான் . ஆண் பிள்ளை அழுவதை கேவலமாக பார்ப்பது ஒரு அடிமுட்டாள் தனம். ஆண் பிள்ளையானால் என்ன ? அவனுக்கும் இதயம் இருக்கிறது. சுப்புவைத் தன் தங்கை தனலட்சுமியுடன் பார்த்த அண்ணனுக்கும் மன்னிப்பு கேட்க வந்த சுப்புவுக்கு தேரிச் செம்மண்ணில் நடந்த சண்டைக் காட்சி உண்மையில் சண்டைக் காட்சி அமைத்தவருக்கும் ஒளிப்பதிவு செய்தவர்க்கும் இடையே நடந்த சேவல் போட்டி . மிக அழகான காட்சி அது. துணிச்சலோடு எடுக்கப்பட்ட படம். பார்த்தவர்கள் எதிர்மறை விமர்சனங்கள் தரமாட்டார்கள். கார்த்திக் சுப்புராஜ் இயக்கம் , இசைஞானியின் இசை, கணேஷ் சிவாவின் படத்தொகுப்பு, திருநாவுக்கரசு அவர்களின் ஒளிப்பதிவு, கணேஷ் சுப்புராயன் அவர்கள் அமைத்த சண்டை காட்சிகளோடு பூரண அலங்கார பூஷிதையாக வலம் வருகிறாள் டோரத்தி.

வாசித்த போது வந்த இந்த ஒரு வரி நகைச்சுவை நிகழ்ச்சி ஒன்றை நினைவுபடுத்தியது. "படத்தைப் போடுங்கைய்யா" என்று மொத்த கொட்டாயே கத்தியது." இது தான் வந்த வரி. டென்ட் கொட்டாய்ல மட்டுமல்ல தியேட்டர்லயுமே அந்த நாட்கள்ல நிறைய விளம்பரங்கள் வரும். அது போர் அடிச்சு போகும் போது இப்படிக் கத்துவாங்க. எங்க ஊர் மக்கள் ரொம்ப குசும்புக் காரங்களா? ஒரு நாள் தியேட்டர்ல ( எந்த படம்னு ஞாபகம் இல்ல. இருந்தாலுமே எதுக்கு வம்பு) படம் தொடங்கி அரைமணி நேரம் ஓடிடுச்சு. படு மொக்கை படம். போர் அடிச்சாலே தியேட்டரின் அமைதி கொஞ்சம் கொஞ்சமாய் கலைந்து சலசலப்பு உருவாகும். அங்கங்கே பெருமூச்சு பேரலையாய் எழும். அந்த நேரத்தில யாரோ ஒருவர் "படத்தைப் போடுங்கய்யா" என்று கத்தினார். படம் போட்டு அரை மணி நேரத்துக்கு மேல ஆச்சுது. அவர் அப்படி சொன்னதும் மொத்த தியேட்டரும் "கொல்" லெனச் சிரித்தது. அதன் பிறகு மக்கள் எரிச்சலோட படம் பார்க்காம ஜாலியா சிரிச்சு கமென்ட் அடிச்சுகிட்டே பார்த்து முடிச்சாங்க. ஜாலியான உங்கள் சினிமா அனுபவங்களையும் பகிருங்களேன்.

#உஷார் படுத்தும் பதிவு

கொஞ்ச நாட்களுக்கு முன்னால என் கணவர் போனில் ஒரு அழைப்பு வந்தது. "உங்கள் எண்ணிலிருந்து நிறைய பேசி இருக்கிறீங்க. நாங்க TRAI ல இருந்து பேசுறோம்" னு. நாங்க ரெண்டு பேரும் விழுந்து விழுந்து சிரிச்சோம். ஏன்னா போன்ல பேசுறதுன்னா என் வீட்டுக்காரருக்கு அவ்வளவு அலர்ஜி. எல்லோரும் வெளியே போகும் போது தான போனை எடுத்திட்டு போவாங்க. இவர் வெளியே போகும் போது வீட்டுல வச்சுட்டு போயிடுவார். அந்த மனுஷனுக்கு இப்படி ஒரு கால். இப்போ நேற்று ஒரு அழைப்பு. தலைமை செயலகத்தில் இருந்து பேசுறதாச் சொல்லி அவருடைய பேர், வீட்டு விலாசம், ஆதார் எண் முதற் கொண்டு சரியா சொல்லி "நீங்க டெல்லி போயிருக்கீங்களா? இல்லை. டெல்லியில உங்க பேர் அட்ரஸ்ல ஆதார் கார்டை proof ஆக் கொடுத்து ஒரு சிம் வாங்கி இருக்கிறாங்க. அதுக்கு நான் என்ன செய்யணும்." இப்படி உரையாடல் நடந்தது. இதைக் கேட்டுக் கொண்டே வந்த நான் என்ன விஷயம் னதும் சொன்னார். நான் " ஸ்பீக்கர்ல போடுங்க. யார் வடக்கத்தி காரங்களா? னு கேட்டேன். நான் சொல்வதைக் கேட்டதும் காலைக் கட் பண்ணிட்டாங்க. பிறகு ஒரு வீடியோ வந்தது. நாம வீட்டுல பேசுற எல்லாத்துக்கும் சம்பந்தமாத் தான் வீடியோ வந்திடுமே. ஒரு குறிப்பிட்ட வங்கியின் தகவல்கள் hack செய்யப்பட்டதாகவும் அதனால் நம் பணம் பறி போக வாய்ப்பில்லை என்றும் ஆனால் எல்லா தகவல்களையும் மிகச் சரியாகச் சொல்லி நம்மை ஏமாற்ற வாய்ப்புண்டு என் றும் வந்தது. எல்லா தகவல்களும் சரியாகச் சொல்லும் பட்சத்தில் OTP கேட்டால் கொடுத்திடுவோம். பணம் பறி போய் விடும். எந்த ஒரு சந்தர்ப்பத்திலும் OTP ஐ மட்டும் சொல்லி விடாதீர்கள். முக்கியமாக அவர்கள் குறி வைப்பது வயதானவர்களைத் தான். இளைஞர்கள் அளவு டெக்னாலஜி தெரிந்திருக்க மாட்டார்கள் என்ற எண்ணம் தான். ஆதார் கார்ட் எங்கேயாவது கொடுத்து இருக்கிறீர்களா என்று கேட்டிருக்கிறாங்க. . இவர்' எங்கே போனாலும் முதல்ல ஆதார் கார்டைத் தான கேட்கிறாங்க" என்றார். வங்கியின் பல தகவல்களுக்கு பாஸ்வர்ட் தொலையேசி எண்ணும் பிறந்த நாளும் இணைந்ததாகத் தான் வைத்திருக்கிறார்கள். ஆதார்ல பிறந்த தேதி கிடைச்சிட்டா ஆபத்து தான. நம்ம அலைபேசி எண்ணில் அழைத்து நம்ம பேரைச் சரியாச் சொல்லி பல விதமான ஏமாற்று அழைப்புகள் வருகின்றன. பயப்படாம கூலா பதில் சொல்லுங்க. எந்த வித கூடுதல் தகவலும் சொல்லிடாதீங்க. இது ஒரு எச்சரிக்கைப் பதிவு.

குளத்தில் கல் எறியாதீர்.

குளத்தில் கல் எறியாதீர். யூட்யூப் பணம் கொடுக்க ஆரம்பித்த பிறகு வெகு சில பெண்கள் பணம் கிடைக்கிறது என்பதற்காக ரொம்பவும் தரம் தாழ்ந்து வீடியோ போடுறாங்க. என் உடல் என் சுதந்திரம் என்ற அளவில் பெண் குழந்தைகளும் எவ்வளவு கவர்ச்சிகரமாகத் தூண்டும் விதத்தில் ஆடை அணிய முடியுமோ அவ்வளவு கவர்சிகரமாக ஆடை அணிகிறார்கள். இதற்கும் குளத்தில் கல் எறிவதற்கும் என்ன சம்பந்தம் என்று நினைக்கிறீர்களா? ஆண் மனது ஒரு குளம் போலத் தான். வெளிப் பார்வைக்கு அமைதியாகத் தெரியும். ஆனால் கலங்கி விட்டால் குடும்பம் குழந்தை எதை இழந்தாவது அதை அடையத் துடிப்பார்கள். தான் ஆசைப்பட்டது கிடைக்கும் வரை இரை தேடும் புலியின் கண்களை ஒத்துத் தான் அவன் நிலை இருக்கும். கொதி நிலையில் இருக்கும் தன் உடம்பு குளிர கிடைப்பவரை, அது குழந்தைகளாக இருந்தால் கூட பலியாக்கி விடுகிறார்கள். குளத்தில் கல் எறிபவருக்குத் தண்டனை கிடைப்பதில்லை அதனாலேயே தன் தவறு புரியாமல் இருக்கிறார்கள். இயற்கையிலேயே கொடூர குணம் கொண்டவர்கள் இருப்பார்கள் . நான் சொல்வது அவர்களை அல்ல. தூண்டப்பட்டு தவறிழைப்பவர்கள். அந்த பாவத்துக்கு நாம் ஆளாக வேண்டாமே!!